या किसी शिक्षा पद्धति चलाई र भाई कति नाश कर दिया।
धेले की ना रह रही आज पढ़ाई र भाई कति नाश कर दिया।।
ना बालक फटकारने ना उनके डंडे मारने सरकार नै कर राखे ओडर जारी।
कति चुप रहना होगा ना कुछ कहना होगा चाहे बालक कर दे गलती भारी।
रोज स्कूल में आवे ना बेशक।
करके याद सबक सुनावे ना बेशक।
रोज काम करके ल्यावे ना बेशक।
करनी होगी मास्टरां नै समाई र भाई कति नाश कर दिया।।
स्कूल में आवन का काम नहीं फेर बी कटे नाम नहीं न्यू बालक सर प चढ़गे।
खाना मुफ्त में मिले रपिये गौझ में घले न्यू स्कूलां में बालक बहोत घने बढ़गे।
कॉपी किताब मुफ़्त मिलें।
बालक पढ़ाई में सुस्त मिलें।
अलबाद करण में चुस्त मिलें।
सरकारी स्कूलां की याहे स सच्चाई र भाई कति नाश कर दिया।।
प्रयोगशाला बणग्या विभाग न्यू फूटे सं भाग बेचारे इन मास्टरां के।
काम पूरा लेवें तनख्वाह आधी देवें चूल्हे बी ना जलते इनके घरां के।
गेस्ट बेचारे साच्ची रोवें सं।
कम्पुटर आले जिंदगी खोवें सं।
मंत्री अफसर चैन त सोवें सं।
शिक्षा विभाग की दुर्गति इन नै बनाई र भाई कति नाश कर दिया।।
बीस नंबर मास्टर देवें साल में दो ब पेपर लेवें फेर बी रिजल्ट खराब आवे स।
मास्टर खुद करवावें नकल बेरा ना कित गयी अक्ल कोय ना बदलाव चाहवे स।
सरकार मास्टरां प लेवें सत्तर काम।
कुछ पढ़ाते ना ट्यूशन करें सवेरे शाम।
""सुलक्षणा"" नै कह दिया हाल तमाम।
ज्ञान लेन देन की जगाहं करें कमाई र भाई कति नाश कर दिया।।
टिप्पणियाँ
एक टिप्पणी भेजें