ईब तक ठंडे बैठे थे - ईब तक ठंडे बैठे थे, नया इतिहास बणाद्यांगे |
दुनिया मैं 206 देश हैं इन मैं तै एक घटाद्यांगे - दुनिया मैं 206 देश हैं इन मैं तै एक घटाद्यांगे ||
भाईचारा संधि समझौते कर कर के हम हार लिए
कदे एक कदे दो कदे अठारा घणे सैनिक थमनै म्हारे मार दिए ||
कितणे वीर म्हारे शहीद होगे जो मौत के घाट थमनै तार दिये
अर थम भी कदे सुधर ज्योगे न्यू सोच सोच हम हार लिए||
थारे पै जो घा उधार लिए इब सुधाँ ब्याज लौटाद्यांगे
दुनिया मैं 206 देश हैं इनमैं तै एक घटाद्यांगे I
सन पैसठ कैहत्तर याद करो - सन पैसठ कैहत्तर याद करो,
कारगिल की याद दुवावां के,
हंस के कुर्बानी देदी थी मायाँ के लाल गिणावां के,
इतणी कितणी विधवा होगी उनका सिंदूर फलावां के
अर जाम्म्ण तै पहलां अनाथ होये उनके भी नाम गिणावां के??
इब आपणा मन समझावां के ×2 थार धड़ तै शीश उड़ाद्यांगे
दुनिया मैं 206 देश हैं इनमैं तै एक घटाद्यांगे ||
तू न्यू ना सोचै यो भारत आपस मैं लड़दा जावैगा
पाणी अर बोली की ढाला 2 कोस पै बदल्या पावैगा,
जब आन तिरंगा की आवै एक रस्सी मै बांध जावैगा,
हर हिन्दू मुस्लिम सिख ईसाई तन्नै बॉर्डर पै खड्या पावैगा,
फेर हर कोए शास्त्र ठावैगा तन्नै छठी का दूध याद दुवाद्यांगे,
दुनिया मैं 206 देश हैं उनमै तै एक घटाद्यांगे ||
जो चाँद नै फ़िक़्क़ा करदे सै, दुनिया पै वोए दाग़ सै तूं
म्हारै रंग गुलाल तै खेल्ल्या करैं, चाह्वै खेलणा खूनी फाग सै तूँ,
तन्नै खंगाल के देखण लागां पावै फोक्का झाग सै तूं
अर कितणी बार छाती कै लाया लिकड़या धोखेबाज सै तूं||
बिना नूण मिर्च का साग सै तूं, तन्नै काचे नै भी खाज्यांगे
दुनिया मैं 206 देश हैं इनमैं तै एक घटाद्यांगे। ||
ईब तक जो तन्नै ना देख्या वो ईब तन्नै दिख ज्यावैगा
युधिष्ठिर अर्जुन की गेल्याँ खड्या दुर्योधन भी पावैगा
सुभाष बोस की फौज तैयार सै|
तन्नै युद्ध के नियम सिखावैगा ना सोचै भगत सिंह खूग्या
हर भगतसिंह तन्नै उरै पावैगा महाराणा प्रताप भी आवैगा तेरी ईंट तै ईंट भिड़ाद्यांगे
दुनिया मैं 206 देश हैं इन मैं तै एक घटाद्यांगे ||
जो शहीद पति की अर्थी ठालें वे भारत की नारी सैं
देश की खात्तर हथियार ठा लिए वा राणी लक्ष्मीबाई भी म्हारी सै
दुष्टा का संहार करण नै माँ दुर्गे भी आरी सै
राक्षसां का सिर तारण की करी काली माँ नै तैयारी सै|
इसी भारत की नारी सै, तेरी चारों कूण हलाद्यांगे
दुनिया मैं 206 देश हैं इन मैं तै एक घटाद्यांगे||
जै लड़ना चाह्वै सै डटके तो खुलके शाहमी आजा नै
कितणा दम सै तेरी छाती मैं एक बार तो दिखाजा नै
कुत्ता बिल्ली आली बोहोत होली ईब शेरां तै टकराज्या नै
रांड नै पुत्ती होणा एक दिन सब कुछ आज कराज्या नै|
विकास राखी के शाहमी आज्या नै तू हिन्द कै शाहमी आज्या नै जो कही सच्ची करके दिखा द्यांगे
दुनिया मैं 206 देश हैं इनमैं तै एक घटाद्यांगे||
टिप्पणियाँ
एक टिप्पणी भेजें