किसान जीन नै मिले पदम श्री पुरस्कार।

भारत सरकार की औड़ त दिए जाण आले पदम श्री पुरस्कार इब के न अपने देश के 12 किसानां तई मिले स। एक ईसा देश जड़े खेती हर रोजगार त जुड़ री स इसे पुरस्कार जब किसे खेती बाड़ी आले आदमी न मिले स तो और भी बढ़िया बात लागे स। आज थामने इन सारे किसानां के बारे म बतावेंगे।

1. राजकुमारी देवी-

 राजकुमारी देवी 

या ताई अपने एरिया म किसान चाची के नाम त घणी जाणी जावे स। ताई के गाम का नाम स आनंदपुर जो बिहार के मुजफ्फरपुर जिले म स। ताई हाथ भी देख दे स अर माटी की गुणवत्ता न चेक करके अपने एरिया के किसान भाइया न बत्ती फयदें आली खेती करणी सिखावे स। ताई साईकल म औरे धौरे के गामा म जा क खेती अर लुगाईया की समस्या सुन के उनने दूर करण की कोशिश करे स।

2. कंवल सिंह चौहान : 

 कंवल सिंह चौहान

ताऊ स अपने हरियाणे के गाम अटेरने का। ताऊ कंवल सिंह पहला भी प्रधानमंत्री धौरे त इनाम ल्या रा स। उ त ताऊ स वकील पर घनखरा टेम खेती म लावे स। ताऊ मशरूम अर बेबी कॉर्न की खेती तई मशहूर स। देश विदेश के नरे खेती करणीया ताऊ प खेती करणी सीख क जावे स।

3. वल्लभभाई वासरामभाई मरवानीया: 

वल्लभभाई वासरामभाई मरवानीया

यू ताऊ स जूनागढ़, गुजरात त। 13 साल का था ताऊ जब त खेती क़रण लाग रा स। आज 96 साल का हो लिया स ताऊ। ताऊ बस पाचमी जमात पास स पर गाजर के खेती का तगड़ा तजुर्बा स।

4. कमला पुजारी

कमला पुजारी

ताई उड़ीसा के कोटापुर जिले के आदिवासी गाम की स। अर धान की लोकल किस्म के बारे म घणी कसूती पकड़ स। ताई यूरिया अर डीएपी छोड़ के आर्गेनिक खेती तई हांगा ला री स। ताई इबकै न उड़ीसा के प्लानिंग बोर्ड म भी मेम्बर बनाई स।

5. वासरामभाई जगदीश प्रसाद पारिख : 

वासरामभाई जगदीश प्रसाद पारिख

ताऊ आर्गेनिक खेती अर फूल गोभी की खेती ताई मशहूर स। ताऊ का नाम गिनीज बुक ऑफ वर्ल्ड रिकॉर्ड म भी दर्ज स। गाम स सीकर राजस्थान। ताऊ के खेत म 15 किलो तई की गोभी उतरे स।

6. भारत भूषण त्यागी:

 भारत भूषण त्यागी

ताऊ दिल्ली यूनिवर्सिटी त बीए कर रा स। अर आर्गेनिक खेती करा करे। ताऊ का गाम स बुलन्दशहर ताऊ न अपने गाम म किसान भाइयां तई ट्रेनिंग सेन्टर भी खोल राखा स।

7. राम शरण वर्मा:

राम शरण वर्मा

यूपी के बाराबंकी जिले के दौलतपुर गाम के रहण आले ताऊ न अपने आप खुद कई फ़सला की हाइब्रिड किस्म त्यार करी स। अर इब ताऊ सारे किसान भाइयां न फ्री म सलाह मशवरा भी देवे स। तकनीक, बढ़िया गुणवत्ता अर फ़सल चक्र ये 3 चीज जरूरी बतावे स ताऊ। ताऊ केले,आलू,टमाटर अर गेंहू की खेती बत्ती करे स।

8. यादपल्ली वेंकटेश्वर राव:

यादपल्ली वेंकटेश्वर राव

इस माणस न भी आर्गेनिक खेती म पूरा ज्ञान हो रा स। ताऊ हर महीने एक पत्रिका काढ़े स जिसमे खेती की सारी जानकारी पावे स। अर किसानां खातर एक मोबाइल अप्प भी बनाई स। ताऊ का गाम स कुन्नूर आंध्रप्रदेश म

9. बाबूलाल दहिया :

75 साल का हो लिया ताऊ अर गाम स पिथौरागढ़ जिला स सतना, मध्यप्रदेश म। पहला ताऊ डाकिया था अर रिटायर होए पाछे आर्गेनिक खेती म करड़ा होके मण्ड गया। 8 किल्ले स ताऊ के अर इब तई 110 ढाल के धान की फसल बो ली। इन 110 ढाल के धाना म कम पानी की जरूत पड़े स।

10. हुकुमचंद पाटीदार:

हुकुमचंद पाटीदार

ताऊ न स्वामी विवेकानंद के नाम प खेती बाड़ी का फार्म खोल राखा स। ताऊ का गाम स झालावार राजस्थान म। अर आर्गेनिक खेती म कसूती ढाल जुट रा स ताऊ। 2004 त ताऊ आर्गेनिक खेती म जुट रा स। ताऊ इब तो ऑस्ट्रेलिया, जापान, न्यूज़ीलैंड, जर्मनी, फ्रांस अर कोरिया म भी अपनी फ़सल बेचे स।

11 सुल्तान सिंह :

सुल्तान सिंह

ताऊ सुल्तान करनाल जिले के बुटाना गाम का रहण आला स। कैटफ़िश अर झींगे की जमा खत्म होण आली प्रजाति का प्रजनन करके बढ़िया पीसे बनाण लाग रा स। करनाल म मौसम भी मछली पालन तई सही कोण्या पर फेर भी ताऊ न धुम्मा ठा राखा स। 

12 नरेंद्र सिंह :

ताऊ नरेन्द्र पानीपत के इसराना गाम का रहण आला स। ताऊ की डेरी म 150 दूध देण आले डांगर स। 20 साल पहला 10 डांगर थे ताऊ के धौरे। ताऊ अपनी डेरी म डांगरा का प्रजनन करवावे स अर देश विदेश त लोग ताऊ त फेटण आवे स।

Congratulations to all the inspiring farmers!!! We are really proud of you!!!

App Download Link :

• Apple : 

https://l.facebook.com/l.php?u=https%3A%2F%2Fitunes.apple.com%2Fin%2Fapp%2Fradio-kasoot%2Fid1086344819%3Fmt%3D8%26fbclid%3DIwAR0kUuBtiXTreaH9dHAr0jPYsB9Qgg1uBHuKxeFI9yIU00cCUL83boehUKU&h=AT3l4LhJ-KdgVvTUsenxZRlvTaUCrdmm7rwYXi7vyayeJIiSvLEcR0LUzr7uS3kwd6a7eNH7fqTTucV9yQTit0IqUHmUI6I0CX5FQhzzqyHdEdhlrnTN7UNeEU2KCTXDwkr5ODwslyE

• Android :

https://market.android.com/details?id=com.radiokasoot.www&fbclid=IwAR3BNAU0zxzWnQ40c_Z2nlEfK_7g2yUBi05w_E6WoOAmedUrCUKp5isGF_g